داوا دەکرێت وێستگەیەکی گۆڕەری کارەبا بۆ ناوچەی قەرەناو لە ناحیەی شوان دابمەزرێت
بەهۆی خراپی و تێکچوونی دۆخی کارەبا و بەدەنگەوەهاتنی داواکاری دانیشتوانی ناوچەکە، هەوڵەکان بۆ دامەزراندنی وێستگەیەکی نوێی کارەبا لە ناحیەی شوان دەستیان پێکردووە و پارێزگاری کەرکوک و ئەنجومەنی نوێنەرانیش هاتوونەتە سەر هێڵ.
مازن غەریب عبدالرحمن، ئەندامی ئەنجومەنی نوێنەرانی عێراق، لە نووسراوێکی فەرمیدا کە ئاڕاستەی وەزارەتی کارەبای عێراقی کردووە، داوای ڕەزامەندی بەپەلە دەکات لەسەر دامەزراندنی وێستگەیەکی گۆڕەری گواستراوە (متنقلة) بە توانای 25\text{ MVA} (11/132\text{ KV}) لە ناوچەی قەرەناوى سەر بە ناحیەی شوان.
زیانی ماددی بە هاووڵاتیان گەیشتووە
لە نووسراوەکەدا هاتووە، کە دانیشتوانی ناوچەی قەرەناو بەهۆی پچڕانی بەردەوام و درێژخایەنی تەزووی کارەبا و کێشەی دابەزینی توندی ڤۆڵتیە، ڕووبەڕووی بارودۆخێکی سەخت بوونەتەوە. ئەمەش بووەتە هۆی دروستبوونی زیانی ماددی زۆر بە ئامێرە کارەباییەکانی ماڵان و پەککەوتنی ژیانی ڕۆژانەی هاووڵاتیان.
پەرلەمانتارەکە ئاماژەی بەوەش کردووە، کە پێشتر پارێزگاری کەرکوک بە نووسراوی فەرمی ژمارە (٢٩٦٥٥) لە ٢٢ی کانوونی یەکەمی ٢٠٢٥، پشتگیری خۆی بۆ داواکارییەکانی خەڵکی ناوچەکە دەربڕیوە و بابەتەکەی گەیاندووەتە لایەنە پەیوەندیدارەکان.
چارەسەر چییە؟
بۆ کۆتایی هێنان بەم کێشەیە، پێشنیاژ کراوە وێستگەیەکی گۆڕەری گواستراوە لەسەر هێڵی (132\text{ KV})ی تێپەڕبوو بە ناوچەکەدا دابمەزرێت، کە هێڵەکە سەر بە هەرێمی کوردستانە (هێڵی بازیان - باشووری هەولێر). ئەم هەنگاوە دەبێتە هۆی کەمکردنەوەی بارگرانی و خنکانی (الاختناقات) سەر تۆڕی کارەبای ناوچەکە و سەقامگیربوونی خزمەتگوزارییەکان.
وەزارەت دێتە سەر هێڵ
بەپێی ئەو بەدواداچوونانەی کراون، نووسراوەکە گەیشتووەتە دەست بریکاری وەزیری کارەبا و ناوبراو ڕەزامەندی سەرەتایی نیشانداوە و ڕایسپاردوون کە ڕێکاری پێویست و بەپەلە بگرنەبەر بۆ چارەسەرکردنی کێشەکە و کۆتایی هێنان بە ناڵاندنی خێزانەکانی ئەو ناوچەیە.
