هێز دەنێردرێتە سنورەکانی هەرێمی کوردستان
هادی عامری: پێشنیاری ناردنی هێزی سەربازیی عێراق بۆ سنووری هەولێر و ئێران
هادی عامری، سەرۆکی ڕێکخراوی بەدر، لە وتار و دیدگایەکی نوێدا جەختی لەسەر بەهێزکردنی سوپای عێراق و تواناکانی بەرگریی ئاسمانی کردەوە و گوتی عێراق دەبێت توانای پاراستنی خاک و دانیشتووانی خۆی هەبێت و دەستێوەردانی دەرەکی لە کاروباری ناوخۆی عێراق کەم بکرێتەوە.
لە هەمان کاتدا، بەپێی ئەو ڕاپۆرتانەی بڵاوکراونەتەوە، عامری باس لە ناردنی هێزەکانی سوپای عێراق بۆ سنووری نێوان هەولێر و ئێران کردووە؛ ئەمەش لە کاتێکدایە کە ئاڵۆزییە ئەمنییەکان لە ناوچەکەدا زیاد بوون.
ئەم هەنگاوە پەیوەندی بە زیادبوونی گرژییەکان لە سنووری ئێران و هەرێمی کوردستانەوە هەیە، بە تایبەتی دوای ئەو هێرشانەی کە لە ماوەی ڕابردوودا ناوچەکانی هەرێمی کوردستانی عێراقیان کردووەتە ئامانج.
لە لایەکی تریشەوە، عێراق پێشتر هەنگاوی بۆ بەهێزکردنی بوونی هێزەکانی پاسەوانی سنوور لە سنووری ئێران و تورکیا لە ناوچەکانی هەرێمی کوردستان هەڵگرتووە، بە هاوکاری و هاوتەریبی لەگەڵ هێزەکانی پێشمەرگە، بۆ کۆنترۆڵکردنی سنوور و ڕێگریکردن لە تێپەڕین و چالاکییە چەکدارییەکانی دەرەوەی سنوور.
