بەڕێوەبەرایەتیی گشتیی هاتووچۆ چەند ڕێنماییەکی گرنگ بۆ شۆفێران لە وەرزی هاویندا بڵاودەکاتەوە
لەژێر سەرپەرشتیی ڕاستەوخۆی دکتۆر حوسێن عەوادی، بریکاری باڵای وەزارەتی ناوخۆ، و لەپێناو پاراستنی گیانی شۆفێران و بەکارهێنەرانی ڕێگاکان، فەریق دکتۆر عودەی سەمیر حەسانی، بەڕێوەبەری گشتیی هاتووچۆ، هاوکات لەگەڵ بەرزبوونەوەی پلەکانی گەرما لە وەرزی هاویندا، کۆمەڵێک ڕێنمایی و ڕاسپاردەی بەپەلەی ئاراستەی شۆفێرانی خاوەن ئۆتۆمبێل کرد.
بەڕێوەبەرایەتیی هاتووچۆ داوا لە شۆفێران دەکات پابەندی ئەم خاڵانەی خوارەوە بن:
پشکنینی خولی: دڵنیابوونەوە لە بوونی مەرجەکانی توندوتۆڵی و سەلامەتی لە ئۆتۆمبێلەکاندا و ئەنجامدانی پشکنین و چاککردنەوەی بەردەوام.
دوورکەوتنەوە لە ماددە تەقەمەنییەکان: بە هیچ شێوەیەک عەتر، بتڵی غاز، چەرخ، پاتری، یان هەر ماددەیەکی تری شلەمەنی و شتی شیاو بۆ گڕگرتن لەناو ئۆتۆمبێلدا جێنەهێڵرێت، بەتایبەت کاتێک ئۆتۆمبێلەکە لەبەر تیشکی ڕاستەوخۆی خۆردا ڕادەگیرێت.
ئامادەکردنی ئاگرکوژێنەوە: دڵنیابوون لە کارکردن و ماوەی بەسەرنەچوونی بتڵی ئاگرکوژێنەوە و جێگیرکردنی لە شوێنێکی ناو ئۆتۆمبێلەکەدا کە لە کاتی پێویستدا بە ئاسانی دەست پێی بگات.
پشکنینی تایەکان: پشکنینی بەردەوامی تایەکان و دڵنیابوون لە ڕادەی پەستانی هەوای ناو تایەکە، بۆ ڕێگریکردن لە تەقینیان بەهۆی کاریگەریی بەرزی پلەکانی گەرماوە.
سەرچاوەی سووتەمەنی: پێویستە سووتەمەنی تەنها لە وێستگە فەرمییەکانەوە وەربگیرێت و بە هیچ شێوەیەک لەو فرۆشیارانە نەکڕدرێت کە لەسەر شەقامەکان بە نایاسایی سووتەمەنی دەفرۆشن.
چاودێریکردنی شلەکان: بەدواداچوونی بەردەوام بۆ ئاستی ئاوی ساردکەرەوە (ڕادێتەر) و ڕۆنی بزوێنەر، ئەمەش لەپێناو پاراستنی کارایی ئۆتۆمبێلەکە و ڕێگریکردن لە بەرزبوونەوەی پلەی گەرمی بزوێنەرەکە (حماوة).
له کۆتایی ڕاگەیەندراوەکەدا هاتووە، کە پابەندبوونی هاووڵاتییان و شۆفێران بەم ڕێنماییانەوە، ڕۆڵی سەرەکی دەگێڕێت لە کەمکردنەوەی ڕووداوەکانی هاتووچۆ و ئاگرکەوتنەوە، و دەبێتە هۆی پاراستنی سەلامەتیی هەموان.
